ازاي اتقتلت البسمه ف عيون بسمه؟؟؟

كنا طالعين نقضي كام يوم ف الساحل ونغير جو نزلت مع اخواتى ع البسين وكانوا بيلعبو واخر سعاده وهناك شفتها لفتت نظري من اول نظره شفت ف عنيها احساس غريب متفهمش هو احساس بالقهر ولا بالظلم ولا بالأهانه ولا بأيه شفت ف عنيها براءه مشفتهاش ف حياتي من اول ما شفتها وانا عيني منزلتش من عليها طفله جميله وبريئه وعمرها ميتعداش ال عشر سنوات وبتشتغل عند اسره وبترعي اطفال ف سنها طب ازاي نستني انها ف يوم من الايام تكون انسانه سويه ف مجتمع قتل برائتها شفت ف عنيها امنيه بسيطه انها تكون طفله بس كده هو ده كان حلمها اللي شفته ف عنيها كانت هتموت وتنزل البسين بدل ما تستني الهوانم الصغيرين عشان تغير لهم هدومهم وتشيل لهم الشنطه صعبت اوي عليا وهي اخدت بالها اني مركزه معاها وشافت ف عنيا حب كبير وشفقه بيها وانتهي النهار ونزلت بالليل كان فيه حفله وبشكل لا ارادي كنت بدور عليها وانا بتابع اخواتى وعيني بتدور عليها واخيرا لقيتها شايله الشنطه واللاب توب للبيه وهما قعدوا وهي اخدت ولاد الناس اللي هي مش زيهم وراحت تلاعبهم ف مكان الالعاب وعنيها يا روحي عليهم ونفسها تلعب زيهم ساعتها بس قلت حسبي الله ونعم الوكيل ف اهلها اللي سابوها تشتغل ف السن ده وبعدين قلت لنفسي محدش يعرف ظروفهم ايه بس رجعت تاني قلت وهي ذنبها ايه تتقتل طفولتها ليه شفت ف عنيها نظره توسل فناديتها وسألتها عن اسمها بس كانت خايفه ترد ولما اتطمنت قالت بسمه بوستها ولما اديتها مبلغ من المال سألتني عاوزاني اجيبلك ايه قلت لها ليكي تلعبي وتجيبي اللي عاوزاه شفت ف عنيها فرحه لونت وشها الجميل ونورته ومشيت بعد ما شكرتني وهي بتتلفت لا تكون اللي بتشتغل معاها شافتها الحكايه دي مش بنساها وكل ما افكر احزن عشانها ولان مكان البنت دي مدرسه مش بيت تخدم فيه وتتمني كل اللي شايفاه علي الرغم من انها مش طايلاه سؤال محيرني ومش لاقياله اجابه سؤال بيطرح نفسه كل يوم ومع كل طفل زي بسمه ازاي اتقتلت البسمه ف عيون بسمه؟؟؟؟؟؟؟